An Dönnerdag, de 23. Jannewaar was dat sowied. Wat mehr as twee Jahr in Arbeid was, kunn ennelk vörstellt worden. Bi Tee un Krinthstuut van dat Teemuseum harr de Theelacht to en Fest-Akt nöögt. Dietmar Spekker, Heraldiker un Lidd van de Wapenrull Hannover, gifft en Book herut, in dat he de Wapens van de Theelacht, de Fahn van de Leegemoors-Sellskupp, dat neje Wapen van de Oll Börgerlannende, de Wapens van de Arvburenfamilien un Koopburenfamilien in de Theelacht to Nörden tosamenfaat sünd. Mennig Familie hett sied Generationen Wapens, för annern hett Spekker neje Wapens upstellt. De sünd nu in dat Book verenigt, daarbi noch vööl Wetenskupp van de Heraldik un Histoorje. Dat is en moje Book worden, so as all, de daarmit to doon harren, in tomeest körte Anspraken weten leten.
Na dat Begröten dör Synicus Holger Alts stellden sük as Sponsoren Landraad Olaf Meinen un Helmut Feldmann van de Schede-Stiften vör de Versammeln.
Spekker sä, dat Book harr hum vööl Arbeid maakt, man ok Pläseer un Freid brocht. För sien Wark kreeg he en Koop-Andeel van de Ekeler Theele tosproken, de van de Dochter van de Theelachter Johannes R. Fleeth (1900 hento 1968) eerst körtens overgeven worden was. Spekker was, för all düüdlik to sehn, düchtig bewegt. En körte Fest-Vördrag kwamm van Theelachter Dr. Hans-Herrmann Briese over de patronymiske Genetiv in de Familie Briese.
De Namiddag klung mit Theelbeer un Piepenroken komodig ut.
HHB