Nüms kunn sük besinnen, dat al maal so vööl Mannlüü in de Theelkamer wassen.
61 Keerls wassen komen, dat Hüürgeld to böhren. Keen Stohl was mehr freei.
Komen wassen Arv- un Koopburen.
Un ok Gasten. So de Börgmester van Nörden, Florian Eiben. So mennig Jungvolk, dat in Oosterferien mit Vader eerstmaals rinkieken wull.
Ok de Veerten van de Süstergenotenskuppen Leegemoor un Oll Börgerlannen, de Bröörs Hattermann, seten an de Arvburen-Tafel.
Utgeven wurren an disse Fredag, de 11. April 5, de Gaster Theel dör Theelachter Heiko Campen, de Linteler Theel dör Theelachter Dr. Hans-Hermann Briese, de Eber Theel dör Theelachter Remmer Hedemann un de Hover Theel dör Vize-Syndicus Hans-Günter Rühaak.
Well blot to de Vörjahrs-Utgaven bi de Theelacht kummt, de kunn nu hören, wo Syndicus Holger Alts das verleden Jahr nochmaal dörgung:
Ofrekens-Versammeln to Johanni-Baptist, Harvst-Utgaven vör Wiehnachten, Jubiläum van Heiko Campen na 50 Jahr as Theelachter an 19. Määrt 25 (sien Naam steiht nu in golden Schrift up de Ehren-Tafel; de Mannlüü kwammen to Been un klappden hum to Ehren en hele Sett in de Hannen), Rüggtree van Theelachter Meene Schmidt an 10. Määrt 25, de nu as Arvbuur sien Rechten wahrnimmt.
Stuur Wark harr Theel-Boot Theo Peters; he harr keen Beer in Fatten kregen un muss enkelt Buddels utgeven (deelwies mit Stütt van en junge Fent, de ok mit sien Vader up Visiet bi de Theelacht was).
Nadat de Boken sloten wassen, leesden na d’ oll Wennst frömde un egen Texten vör dat open Heerdfüür: Stadtdener Harald Saathoff (to ’t leste Maal in Unifoorm, he geiht daarnaast in Ruh), Koopburen Stefan Griggel un Wilfried Ehrhardt un Arvbuur HH Briese.

HHB
12.04.2025