In de Rieg van de Theelachters van de Ekeler un Linteler Theelen stahn as mien Vörgänger Rudolf Folkerts van 1968 hento 1999 un Johannes R. Fleeth van 1900 hento 1968.
En Dochter van Johannes Fleeth ut Hambörg kwamm vör en paar Maanten na hier un overgaff de Syndicus as Geschenk 2 Andelen van de Ekeler un Linteler Theele. Mit de sull de Theelacht Mannlüü utteken, de wat Besüüners för de Theelacht up de Been stellt hebben.
Daar truff ’t sük good, dat wi jüst so en Mann in Vermick harren, de wi mit de Oorkunn over 1 Koopburen-Andeel ehren wullen.
Ik will daar keen Geheem um maken. Dietmar Spekker hett sük mit sien Wark um dat Wapen-Book van de Theelachts-Familien verdeent maakt. He hett sük mit so vööl Iefer un Fliet an ’t Wark maakt, hett olle Wapens bearbeidt, neje Wapens upstellt un nooit dat Ziel ut de Ogen verloren, ut de Wapen-Sammlung en Book to maken. Daarför seggen wi hum Dank. Un daarum nehmen wi hum in de Kring van Koopburen van de Theelacht to Nörden up. He is nu Koopbuur in de Ekeler Theele un kann alltied in de Theelkamer komen, wenn hier Utgaven sünd.
Heel besünners sull he in de Theelkamer wesen, wenn de Ekeler Theele as Harvst-Theele kört vör Wiehnachten elker Jahr utgeven word.
De Theelachters graleren hum van Harten.

Hans-Hermann Briese
23.01.2025