De Grundidee van de Theelacht to Nörden is dat Arven. De Arvburen hör Familien gahn up dat Jahr 884 torügg, as de Nörders de Slacht tegen de Normannen in de Hilgenrieder Bucht för sük entscheden kunnen. Sietdeem verarven de Arvburenfamilien hör Rechten van Generation to Generation. Na disse Maneer wurren bi de Vörjahrs-Utgaav, as alltied acht Daag vör Karfredag, as Arvburen in de Theelacht upnohmen Frank Ulrichs ut Osnabrück, de arvt, nadaat sien Vader Friedrich Ulrichs körtens ut de Tied fallen was, un Alfred Rosendahl ut Grootheid, de al as de upfolgende Generation sien Söhn mitbrocht harr. Wenn de Rechten in mennig Generation in Vergetenheid raakt sünd, kann de Bewarver na Jahrteihnten antasten un so de Rechten weer upleven laten. So hett Heinz-Hermann Wäcken ut Westerenn up sien Ur-Ur-Urgrootvaders Naam in de Ekeler Theel antast. Up de Roop van de Theelboot „All Arvburen up de Deel“, versammelden de sük vör dat open Heerdfüür un bekakelden dat För un Tegen. De Theelachter för de Ekeler Theel namm de Zeremonie vör. As all Arvburen meenden, Wäcken kunn upnohmen worden, muss he bewiesen, dat he ok wat van Wubbeln versteiht. Wat för en Tofall, dat Wäcken dreemaal achternanner sess Ogen wubbelde! He sull nu för de 18 Ogen 18 Bekers Beer drinken. Dat kunn un wull he neet. So hett he sük freeiköfft. Daarna muss he „entblößten Hauptes“ all Arvburen een Beker van dat smakelk Theelbeer utschenken. Ok dat hett he mit Bravour achter sük brocht un arvde vööl Bifall un Diskkloppen.  (HHB)