In en lüttje Runn fierde de Theelacht an Middeweek, de 19. Määrt, bi Tee un Teekook dat besünner Jubiläum van Theelachter Heiko Campen. Van 1975 of an hett he dat Amt as Theelachter van de Gaster un Neeigroder Theelen wahrnohmen. Vööl Jahren was he daarbi ok noch Syndicus van de Theelacht.
Mit disse Dag hebben van dat Theelachter-Kollegium de Theelachters Heiko Campen, Remmer Hedemann un Dr. Hans.Hermann Briese mitbeleevt, wo dree Theelachters hör Golden Jubiläum fieren kunnen: Gerhard Seeba 2006 un Theodor Ulferts 2009.
Van de Theelacht wassen daarbi Leden van de Theelachts-Utschuss, van de Familie Campen, Theelbood Theo Peters, Stadtdener Harald Saathoff, van de
Leegemoors-Sellskupp un van de Oll Börgerlannen de Veerten Dieter Hattermann un Johann Hattermann.
Neet togegen was Meene Schmidt, de an de 10. Määrt 2025 van dat Amt as Theelachter van de Hover un Trimser Theelen torüggtreden is.
Syndicus Holger Alts leet mit humorig Woorden dat Theelachter-Leven van Campen Revue passeren. He settde de Tied siet 1975 in Betreck to de Welt-Geschichte un -Geschichten.
He overbroch de Dank van de Theelacht. Up de Ehren-Tafel is de Naam Heiko Campen nu mit golden Schrift för alle Tieden upschreven.
De Fier klung mit de Theelachts-Smuus na de oll Wennst ut.
HHB