An Middeweek, de 11. Dezember, wurren de Neeigroder Theel dör Theelachter Heiko Campen un de Trimser Theel dör Theelachter Remmer Hedemann; an Fredag, de 13. Dezember, de Osthover Theel dör Theelachter Remmer Hedemann un de Ekeler Theel dör Theelachter Dr. Hans-Hermann Briese utgeven. De Utgaav gung na d‘ olle Wennst. Theelboot Theo Peters harr weer all best up Stücken brocht. Un so harren de Arv- un Koopburen de Bekers mit Theelbeer vör sük stahn un de lange Toonpiepen an ‚t Dampen.
Well to de Theelkamer instappde, funn sük in en Saal mit Luud-Kulisse weer mit en Gemummel un Gebrummel van de depe Stimmen van de Mannlüü, de sük tegensiedig vööl to vertellen wussen.
De Keerls, de noch echte Buren up en Buurderee wassen, harren dat over Swienpriesen of de Draggt van Landstücken, de annern over dit un dat in Land un Stadt.
Syndicus Holger Alts see Willkomen an Buren un Gasten un stellde vör, wat sük in de Maanten sied de Vörjahrs-Utgaav un de Ofrekens-Versammeln an Johanni Baptist todragen hett.
De Veerten van de Süstergenotenskuppen wassen to de Utgaven nöögt un bedankden sük nahst hartelk för Beer un Tebak un dat Drumundran in de historiske Theelkamer unner dat Olle Raadhuus; van de Oll Börgerlannen wassen komen de Veerten Diedrich Mencke un Johann Hattermann, van de Leegmoor-Sellskupp de Veerten Dieter Hattermann un Peter Lütkehus.
Vör dat open Heerdfüür wurr weer maal vördragen, wat to Lachen of Smüüstern Anlaat gaff. Erich Kleen leesde sien Damenreed nochmaal vör, de he bi d‘ Leegemoor-Smuus upseggt harr, Wilfried Ehrhardt harr en Wiehnachtsgeschicht van en unbekennte Schriever mitbrocht un HBB sunn over de Vergangenheids-Begreep na: „Verleden Tied“.
Dietmar Spekker van de Wapen-Rull Nedersassen see an, dat dat Theelacht Wapenbook token Jannewaar herutkummt. Dat Book mit de Wapens van de Theelacht-Familien sall in de Theelkamer an Dönnerdag, de 23.01.2025 vörstellt worden.
HHB